12 сынып оқушысы Әлібек Оразалин математика пәні бойынша Бат қаласында өтіп жатқан халықаралық IMO олимпиадасының қола медаліне ие болды.
Әлемдік білім сайысында ел мерейін асырған Әлібек пен ұстазы Нұрсұлтан Хаджимуратовты құттықтаймыз!
— Қандай да бір биік белеске жету үшін маңдай теріңді төгіп еңбек ету қажет. Бұл медальды алу үшін мен күн-түн демей білім алдым, оқыдым, іздендім. Әр күн сайын 5-6 сағат уақытымды тек есеп шығаруға жұмсадым. Осы жолда маған жол сілтеген ұстазым Нұрсұлтан ағайыма алғысымды айтқым келеді, — дейді Әлібек.
Тұманды Альбионда өткен олимпиадаға әлемнің 112 елінен 621 оқушы қатысты.
Айта кетейік, халықаралық беделді сайыстың биыл мерейтойы. 1959 жылдан бері үздіксіз өтіп келе жатқан IMO-ның 60 жылдығы. Қазақстандық оқушылар 1992 жылдан бері қатысып келеді.
Олимпиаданың қорытындысы бойынша еліміздің құрама командасы 2 күміс және 4 қола медаль иеленді.