«Әсем келбетіндегі даналық» республикалық сурет байқауы биыл да өз жалғасын тапты. Бұл жолғы тақырып «Менің елім – Қазақстан» деп аталды. Еліміздің мәдениеті мен дәстүрі, әсем табиғатының көріністері, қала мен ауыл тірлігінің пейзаждары, тарихи тұлғалар, мемлекет және қоғам қайраткерлері, спорт, өнер т.б салаларда жетістікке жеткен танымал тұлғалардың портреттік жұмыстары көпшілік назарына ұсынылды.
Байқауға 6-18 жас аралығындағы оқушылар мен шығармашылық пәндер мұғалімдерінің жұмыстары «Графика, «Кескіндеме», «Сәндік-қолдаңбалы өнер» бағыттары бойынша қабылданды. Тақырып бойынша мазмұн мен түстер үйлесім тапқанда ғана ғажап дүние шығады. Осыны ескерген қатысушылар қылқаламмен түскен әр бояуды, әр детальды сөйлетуге тырысқан,-дейді қазылар алқасының мүшелері.
«Өнер және өзін-өзі тану» кафедрасының бастамасымен ұйымдастырылған шараның жыл өткен сайын ауқымы кеңейіп келеді.
– 2018 жылы қалалық деңгейде, биыл республикалық ауқымда өткізіп жатырмыз. Бір ай бойы еліміздің түкпір-түкпірінен жіберілген жұмыстар өте көп болды. 500-ге жуық. Талантты ұл-қыздардың тақырып аясында салған суреттері сан алуан. Осындай шаралар арқылы жас ұрпақтың бойына рухани адамгершілік пен мәдени құндылықтарды сіңіруге, ел мен жерге деген махаббатты арттыруға үлес қосамыз. Сондықтан елдің мәдениетін, рухани байлығын мәңгілік ету жолында көркемөнердің маңызы зор екенін айтқым келеді,-дейді кафедра меңгерушісі Медет Ақшалов.
Байқау қортындысы бойынша жеңімпаздар анықталып, алғыс хаттар мен сыйлықтар табысталды.