МЕКТЕПТЕ АЛҒЫС АЙТУ КҮНІНЕ ОРАЙ КОНЦЕРТ ӨТТІ
1 наурыз – елімізде тұрып жатқан өзге ұлт өкілдері қазақ халқына алғыс айтатын күн. Өткен ғасырдың басында депортацияға ұшыраған мыңдаған адамның отбасы қазақ жеріне көшірілген еді. Қазақ халқы оларды жатсынбай, өз туғанындай қарсы алды. Бүгінде сол түрлі ұлт өкілдері Қазақстанды Отаным деп біледі. Біте қайнасып, бір шаңырақ астында бір үйдің баласындай тату-тәтті жарасымды тіршілік кешіп келеді. Жүзі басқа болғанымен жүрегі бір, тілі басқа болғанымен тілегі бір, мақсат-мүддесі ортақ, бірлігі мықты, достығы берік ұлттар қазақ елінің салт-дәстүріне, ұлттық құндылықтарына құрметпен қарайды. Бүгінгі концерттің де мақсаты – ұлттар арасындағы достықты паш етіп сахналау, құрмет пен ізгіліктен бастау алатын «алғыс айту» секілді ең асыл қасиетті дәріптеу. Концертте көркемөнерпаздар мың бұрала би билеп, әуелете ән шырқады. Түрлі ұлт өкілдерінің салт-дәстүрінен сыр шертер көріністер де сахналанды. Сондықтан мерекелік концерт жиналғандарға жоғары көңіл-күй сыйлады. Кеш соңында мектептің қоғамдық жұмыстарына белсенді ат салысып жүрген ата-аналарға алғыс хаттар табыс етілді.